small kid time
snack time was always da bessesses
all us guys wen sit on top da lanai
and buss out wateva our madda wen pack us
but I was always confuse
cuz my madda usually wen pack me oatmeal cookies or one granola bar
but dem guys madda's
wen pack dem kakimochi, hurricane mix, or nori
i neva did understand how come my snack was so junk
nobody eva like trade snack wit me
some guys even had plenny snacks
dey would trade fo' da odda guys one
but mines was junk
so dey neva trade me
one time nick tomita wanted fo' trade wit me
one pack nori for one granola bar
I neva had nori befoa, but all dem guys had
so i wanted fo' try em
i wen open da wrappa, all excited
but wen i wen try em, i wen spit em out
so nasty i thought
and everybody wen laught at me
